ماڵی خۆم بۆ خۆم، لە گەڵ تۆشدا دەخۆم
مەردان کوڵەجۆیی:
دوێنی لە بابەتێکدا نوسیمان، جەمسەری ئێران سەرکەوت بە سەر جەمسەری تورکیادا. ئەمڕۆش بەو بڕیارەی بە ناو “دادگای فیداڵی عێراقەوە” (کە نابێ کورد نەوت و غاز و سامانە سروشتیەکان بە سەربەخۆیی بفرۆشێ،) ئێران دیسان گورزێکی جەرگ بڕی گەیاند بە جەمسەرەی تورکیا، سونە و بارزانی!
لێرا، ئەو ڕاستیەمان بۆ دەردەکەوێ کە کورد گەمژەی سیاسی هەیە، نەک سیاسەتمەدار. ئەوانش کە بە دەوروبەری ئەم بەناو سەرکردانەی ئەمڕۆی کوردستانەدا، بەناوی ڕاوێژکاری یاسایی و سیاسیەوە خڕبوونەتەوە، جگە لە کۆمەڵێک کاوێژکاروکۆیلەی ترسنۆک و چاوچنۆک، فڕیان بە یاسا و لێکدانەوە سیاسیەکانەوە نیە.
بەفیتی کۆمەڵێک لەم بلیمەتە بەناو شرۆڤەکارانەی کورد، سەرانی دەباشان گەمژانە کەتوونەتە ئەو جەمسەرەی شیعە-ئێران-بریتانیاوە، سەرانی سەری ڕەشش بە هۆی تێوەگلانیان لە جەمسەری تورکیا-سونە-ماسۆنیەوە، سەری خۆیان و کوردیان لە قوڕێکی ڕەشی ئەوتۆ نیاوە چەندین نەوەیی دیکەی کورد لێی دەربازنابن!
لە کوێی دونیادا بووە تۆ شەڕ لە سەر پارەو پۆستی باڵای وڵاتێک بکەیت بە ناوی هاوڵاتی بوونیەوەو، لە فرۆشتنی سەروەت و سامانە سەروشتیەکانشدا بڵێی سەربەخۆم؟!
ئەمەش ئەو پەندە کورییەمان بیر دەخاتەوە کە ئەڵێ “ماڵی خۆم بۆ خۆم، لە گەڵ تۆشدا دەخۆم.”
ئەم کێشمان کێشەی سیاسی و ئابورییە کە لە نیوان جووتە بنەماڵی بارزانی-تاڵەبانی و حکومەتی عێراقدا خولقاوە، ئەم سەرکردانەی کوردی خستوەتە دووفاقەی ئێران-تورکیاوە و ئێستاش جەولەی گەمەلە گەیشتووە بە (نەوت و غاز ڕادست ناکەین و دەیکەین،) ماوەیەکی دوورو درێژی دەخایەنێ، بەڵام لە ئەنجامدا جەمسەری سەفەوی سەردەکەوێ، چونکە کلیلی گرێ کوێرەکانی عێراق بەدەستی ئێرانەوەیە، نەک تورکیا و حکومڕانەکانی کەنداوی عەرەبی.
