مستەفا کازمی؟
نە ڕێککەوت وایکردوەو نە پێویستی کردوە موستەفا کازمی بناسم؛ لەناو باشووری کوردستان و بەتایبەت لەناو بەشێک لەڕۆژنامەنووساندا، کازمی ناسراوەو دۆست و هاوڕێ و برادەریشی هەن، کە ئەمەیان زۆر ئاساییەو ئەویش بۆخۆی لەناو ڕۆژنامەگەری عەرەبیی عێراقدا (ئەلیکترۆنی و کاغەزی) لەدوای 2003 وە ناوێکی دیار بوە.
ئێستا ئەم کاراکتەرە ڕۆژنامەنووس نیە، بەڵکو دەوڵەتمەدارەو لەئاوا پۆست و پلەیەکیشا لەیەککاتدا زۆر ئەرک یان زیاتر لەئەرکێک وەزیفەیەتی و پلانیان بۆ دادەنێ و کار بۆ جێبەجێکردنیان دەکات، بەڕێگاو شێوازی جۆراوجۆر؛ جا ڕەنگە ئەرکەکە کارگێڕی بێ یان کۆەڵایەتی یان سەربازی و ئەمنی یاخود سیاسی و دیپلۆماتی یان ئابووری و تاد..بەوە نیە ڕۆژنامەنووس بوە (موستەفا کازمی)؟ ئەی چیتر؟ بۆشی هەیە لەهەمانکاتدا ڕۆژنامەنووسان ببنە نێچیری و باشترین ئامرازی ڕاوکردنیان بەکاربێنێ!
لەم نووسینەدا دەمەوێ بەکۆنکریتی قسەلەسەر باشووری کوردستان و بژاردە سیاسی و خوێنەوارەکەی بکەم و پێش هەر شتێک ئەمەوێ بێژم (جێگای داخە ئێمە کورد بەپێوانەی بێمەعنایی مەخلوقێکی خۆشباوەڕو خەیاڵ پڵاوین لەپێشی هەموویانەوە بژاردە سیاسییەکەمان بەبێ جیاوازی لەچەپەوە بۆ ڕاست) و قەت نەمانزانیوەو نازانین سیاسەت بکەین؟
ئەوەی بۆ من جێگای سەرنج و تێڕامانە، پشگیرییەکان بێ بەرنامەو پلانە، دوورە لەبەرژەوەندی کۆمەڵانی خەڵکی کوردستان
کازمی نەدیاردەیەکی تازەیە لەناو کایەیی سیاسی و ئیداری و سەربازی و ئەمنی عێراقا؛ نەش دەتوانێ ببێتە دیاردەیەکی نوێ! بەڵکو لەیەک ڕستەی کورتا ئەتوانین بێژین (ئەنجامە، ئەنجامی دۆخێکی سەخت و سەرڕێژ لەقەیران)، جا ئەم قەیرانە تێکەڵەیە لە قەیرانی (سیاسی، ئابووری، کۆمەڵایەتی، دینی و مەزهەبی، بەڕێوەبردن) و چەندینی تر؛ کە وادەکات کازمییەکان لە سفرەوە هەڵتۆقن و لەپڕێکا ببنە ژمارەو دواتر بەشێنەیی بپۆکێنەوە؟
سەرنج بدەن لەدوای 2003 وە (عەلاوی، جەعفەری، مالکی، عەبادی، عادل عەبدلمەهدی) و تازەترینیان (کازمی) دەگەنە ترۆپکی حوکمڕانی لەعێراق و هیوای جۆراوجۆریان لەسەر هەڵدەچنرێ و دواجاریش بەبێ خواستی خۆیان لەناو کاریگەری هاوکێشە هەرێمایەتی و نێودەوڵەتیەکاندا دەپلیشێنەوەو دەکرێنە پەراوێزکەوتووترین کاراکتەر!
بەبۆچوونی بژاردەیەکی نزیک لەچاودێری دۆخی عێراق و کوردستان، (کازمی) نە دیاردەو دەستکەوتی کارتی چارەسەری (دۆخی شڵەژاوی سیاسی نە قەیرانی ئابووری نە قەیرانی کۆمەڵایەتی نە کەمکردنەوەی هەژموون و کاریگەری سیاسەتی هەرێمایەتی و نێودەوڵەتی لەسەر عێراق نە دۆزینەوەی سەرەداوی ڕوو بەڕوو بوونەوەی گەندەڵی نە کۆتایی هێنان بە ململانێی دینی و مەزهەبی نە گوێزانەوەی عێراقە لە ستەم و نادادییەوە بۆ دیموکراسی نە گوێزانەوەی دەسڵاتە لە میلیشیاوە بۆ مەدەنیەت و خەڵک نە دڵنیاییە لە قووتی خەڵک لە دەستی گەندەڵەوە بۆ دەستێکی ئەمین)؛ بەڵکو گۆڕینی دەم و چاوە، دەم و چاوێک ڕەنگە لەپێناو بەرژەوەندی زلهێزەکانی ئامادەو کاریگەر لەعێراق، ببێتە ناشرینترین کاراکتەر، چونکە هەموو ئەو هێزانەی لەعێراق ئامادەبوونیان هەیەو نان بەبێ ئەوان ناکرێتە ئاوا، کازمییەکانیان بۆ بەرژەوەندی خۆیان دەوێ و بەس!
لەیەکەم ساتەوەختی دیدی بژاردەی حکومڕانی و سیاسی کوردەوە بۆ کازمی، وەک چاودێرێک تووشی دڕدۆنگبوون بووم و سەیرم لێهات یان ڕەوانتر لەدڵی خۆمدا دەموت (باشە ئەمانە چۆن وا زوو ئەزموونی تاڵی عەلاوی و جەعفەری و مالکی و عەبادی و مەهدی) یان لەبیرکرد؟ یان ئەکرێ پرسیارەکە وا لێبکەین (ئەم بژاردەیەیی کوردستان بەڕێوە ئەبەن کەی دەگەنە ئەو ئاستە بە لۆژیک مامەڵە بکەن و دوور بکەونەوە لە تەپەگۆڵمەزی)؟ ئایا هەر بەڕاستی ئەوان پێیان وابوو کازمی فریشتەیەو دیاردەیەکی نوێیە بە بەراورد بەوانەی پێشوو یان تەنیا بۆ تێپەڕاندن بوو؟
ئێستا کازمی بۆ بەهێزکردنی پێگەی سیاسی و کارگێڕی خۆی و ئەوانەی لەپشتیەوە، یارییەکەی دەست پێکردوەو بەدیاریکراوی بەئاراستەی کوردستان و هەموو هەوڵەکانیشی لەوێدا چڕکردوەتەوە کە بۆ هەڵبژاردنی دادێ (لیستی سەرتاسەری عێراق و کوردستان) درووست بکات، بۆ ئەم لیستە لەعەوام و خوێنەوار، لەسیاسی و ناسیاسی، تەئیدی دەکەن!
ئەوەی بۆ من جێگای سەرنج و تێڕامانە، پشگیرییەکان بێ بەرنامەو پلانە، دوورە لەبەرژەوەندی کۆمەڵانی خەڵکی کوردستان، هیچ گرنتی و متمانەیەکی تێدا نیەو ڕەنگە بێژن چۆن و بۆچی پێش ڕووداو دەکەوی؟
باشە بفەرموون : با لەئێستاوە هەر گرووپ یان دەستە یاخود حزبێک یان هەر کەسایەتیەک کە دەیەوێ لەگەڵ کازمی ڕێک بکەوێ، با ئیعلانی بکات و بێژێ : پێویستە کازمی لەگەڵ ئێمەبێ کێشەی ناوچە دابڕێنراوەکان و مادەی سەدوچل، کێشەی بودجە، کێشەی مافە دەستوورییەکانی هەرێمی کوردستان، کێشەی پێشمەرگە وەک بەشێک لەدەزگای سەربازی عێراق، کێشەی ناردنی مووچەی فەرمانبەران) و زۆری تر؛ و پێش وەخت بە ڕێککەوتن و لەسەر کاغەز چارەسەر دەکرێ و نەکرا؛ ئێمە لەگەڵی نین و نابین؛ ئەوسا قسەی ترمان ئەبێ!
جا هەر بەڕاستی ئێستا ئەم کاراکتەرە (ڕۆژنامەنووس نیە، بەڵکو دەوڵەتمەدارەو لەئاوا پۆست و پلەیەکیشا لەیەککاتدا زۆر ئەرک یان زیاتر لەئەرکێک وەزیفەیەتی و پلانیان بۆ دادەنێ و کار بۆ جێبەجێکردنیان دەکات، بەڕێگاو شێوازی جۆراوجۆرو بەپشتیوانی مەدرووس).
بۆیە هیچ بەردێکی بەم نەفەسەی ئێستای لەسەر هەڵناچنرێ و ئەبێ (ڕەحمەت لەکفن دزبکرێت)؟!