ووتارەكەی ئیمانویل ماكرۆن بخوێننەوە!
سەرۆك كۆماری فەرەنسا وەك هەڵوێست و ئەركی دەوڵەتداری و دەستووری و ئاكاری خۆی لەبەرامبەر كردەیەكی تیرۆریستی بۆ لێسەندنەوەی گیانی ( سامۆئێل پاتی ) پەیامێكی بڵاوكردەوە . ئەم پەیامە لەناوەندە جیاجیاكان مشت و مڕی زۆری بەدوای خۆیدا هێنا ، لەهەردوو ئاستی ئەرێنی و نەرێنی یان لایەنگیرو دژ ، لایەنگیر ئەوانەی بەهەموو شێوەیەك دژی كاری تیرۆرو تیرۆریستین و بەهیچ شێوەیەك لە فەرهەنگ و كولتووری خۆیانا جێگای ناكەنەوە ، جا كێ پێی هەڵسێ و كێ بیكات و كێ نەخشەی بۆ دانێ و كێ لە پشتیەوەبێ . دژیش ئەوانەی لەژێرناوی ئاینی ئیسلام و داكۆكی لە پیرۆزییەكانی هێرش و پەلاماری ماكرۆن و فەرەنسای بێشكەی شارستانیەت و ڕۆشنگەری ئەدەن ، بێ ئەوەی لە ناوەڕۆكی ووتارەكەی ماكرۆن تێگەیشتبن یان ووتارەكەیان خوێندبێتەوەو گفتوگۆی بكەن ، لەچ شوێنێك سەرچیخ ڕۆیشتبوو پێی بڵێن بوەستەو لەچ شوێنێك پێكابووی پێی بڵێن دەست خۆش !
سەرۆكی فەرەنسا ئاوا دەست بە ووتارەكەی یان پەیامەكەی ئەكات (سامۆئێل پاتی ڕۆژی هەینی بووە ڕووی كۆمار ، بووە ڕووی ئارەزووی ئێمە بۆ لەنێوبردنی تیرۆریستان و سەركوتكردنی ئیسلامیستەكان و ژیان وەك كۆمەڵگەیەك لە هاونیشتمانیانی ئازاد لە وڵاتەكەماندا . بووە ڕووی پێداگیری ئێمە لەسەر زانین، بۆ فێربوون و درێژەپێدانی فێربوون و ئازادیخوازبوون، چونكە ئێمە بەردەوام دەبین ئەی مامۆستا).
كاتێك لە دەست پێكی ووتارەكە ورد ئەبیتەوە، دوور لە شڵەژان دنیا بینیەكی ڕوون ئەبینی و هیچ گرفت و ئاستەنگێك بۆ تێگەیشتن لێی نابینی، بۆ نموونە (بۆ فەرەنسییەكان سامۆئیل ئەبێتە پانتایی بیركردنەوەو كۆشش بۆ ئارەزوو یان ئامانج لە پێناو لەناوبردنی تیرۆریستان، ئەوانەی ئاینی ئیسلام دەسیاسێنن و ئەیانەوێ ئازادی لە مرۆڤ و مرۆڤایەتی بسێننەوە یان بۆ ئەوان فەرەنسییەكان ئازادی و ئازادیخوازی و تێكۆشان لەپێناویا ئامانجێكی گەورەیەو نرخێكی گەورەشی هەیەو ناتوانن و ناشیانەوێ دەست بگرن بە چاویانەوەو دەسبەرداری زانین بن، ناتوانن فێرنەبن و فێربوون فەرامۆش بكەن). بەڵام گرفتی هەرە سەرەكی ئەوانەی لە پشت فەلسەفەو كردەی تیرۆرەوەن لە ڕاستەوە بۆ چەپ و تا ئەگاتە ئیسلامیەكان، ئەوەیە نایانەوێ بزانن و فێربن ، نایانەوێ تێبگەن و ئازادی قبوڵ بكەن ، نایانەوێ رۆشنگەربن و ژیان لێگەڕێن بۆ مرۆڤ و بیركردنەوەكانی ، بۆیە دێن نەك (سامۆئێل) ێك بەڵكو ئەیانەوێ هەموو سامۆئیلەكان بێدەنگ بكەن ، بێدەنگ كردن بە تیرۆری جەستەیی بۆ ئەوان لە هەموو بژاردەیەك گونجاوترەو قەتیش دوودڵ نین لە دەستبردن بۆی !
كاتێك كە سەیری نووسین و پەیام و لێدوانی هەم نوووسەرو هەم ڕۆژنامەنووس و هەمیش واژۆی كۆمەڵێك پەرلەمانتارو هەمیش قسەی لێشاوێك لە خەڵكی بەش مەینەت ئەبینم ، بەزەییم بە كۆمەڵگای كوردەواریا دێتەوە ، كە ئەیانەوێ خۆیان واتەنی بایكۆتی فەرەنسا بكەن ، بەبێ ئەوەی هیچ حاڵی بووبێتن یان بەلایەنی كەم بای ئەوەندە تێگەیشتبن ماكرۆن چی وتوە ؟ با من لەو ئیسلامیانە گەڕێم كە پێیان خۆشە هەر ماوە ناماوەیەك سەرۆكی وڵاتێكی ئەوروپی لەبەرامبەر كردەیەكی تیرۆریستی ئیسلامیەكان بێتە دەنگ ، بۆ ئەوەی بڵێن ئەوەتانێ نەمانوت ئەمانە دژی ئاینی ئیسلامن و پەلاماری پیرۆزییەكانمان ئەدەن ، بەڵام لای ئەوان كاتی ئەنجامدانی تاوانی جینۆسایدكردنی هەڵەبجە ، جینۆسایدی ئەنفال ، جینۆسایدی قەڵادزێ ، جینۆسایدی سەیەدسادق ، جینۆسایدی بارزان ، جینۆسایدی قەزای سمێل ، جینۆسایدی ئەشكەوتی دەكان، جینۆسایدی ئاوایی سۆریا ، جینۆسایدی سەردەشت ، جینۆسایدی دەرسیم ، جینۆسایدی فەیلییەكان ، جینۆسایدی ئێزدییەكان ، بردنی كچ و ژنی كوردو كردنیان بە سەبایە و دەیان تاوانی تر ، گوێیان كەڕو لاڵیش بوون و نقەیان لێوەنەهات ! پرسیارەكە ئەوەیە ئەی كوردو ئەو ناوەندانەی خۆیان بە ڕۆشنگەرو ئازادیخواز ئەزانن لە كوێن و بۆچی ئەوەندە كزۆڵ و دەستەپاچەو لاوازن ، دەبنە ڕووكاری داكۆكی لە شەڕێك كە شەڕی بزووتنەوەی ئیخوانی موسلمینە نەك ئاینی ئیسلام!
دیقەت بدەن ماكرۆن دەڵێ ( ئێمە بەردەوام دەبین لە بەرگریكردن لە ئازادی كە خۆت زۆرت فێركردن و بەیداخی عەلمانیەت بەرز رادەگرین . واز لە كاریكاتۆر ناهێنین و واز لە وێنە دەستییەكان ناهێنین ، ئەگەر ئەوانیدیكەش پاشەكشە بكەن . هەموو ئەو هەلانەی لەسەر شانی كۆمارن بۆ هەموو گەنجانی دەڕەخسێنین بەبێ جیاكاری ) ، من كارم بە سەر ئیسلامی و تیرۆریستەكانەوە نیە ، بەڵام ڕووی پرسیارم لە تۆیە باشە تۆی بەناو ڕۆشنگەر ، تۆی بەناو ئازادیخواز ، تۆی بەناو دیموكراسیخواز ، تۆی بەناو فیمینیست ، تۆی بەناو زۆر شت ، لەخۆت ناپرسی ماكرۆن چی وتوە وا نیگەرانی ؟ ئەو دەڵێ (ئێمە بەردەوام دەبین لە بەرگریكردن ئازادی كەخۆت زۆرت فێر كردن و بەیداخی علمانییەت بەرز ڕائەگرین) یان ئەمە شورەییەكی تیایە بۆ تۆ كە بچیتە پاڵ بەرەیەكی ئیخوانی و نیگەران بیت ! ئەو دەڵێ (واز لە كاریكاتۆر ناهێنین و واز لە وێنە دەستیەكان ناهێنین ئەگەر ئەوانی دیكەش پاشە كشێ بكەن) باشە پێم ناڵێی تۆی بەناو ئازادیخواز ئەو ئازایەتیەت لە كوێوە چنگ كەوت كە دژی ئەم پەیامە بیت و پێت وابێت كاریكاتۆرو وێنەی دەستی كە یەكێكە لە هونەرە جیهانیەكان ، هێرشە بۆ سەر پیرۆزی ! دەوڵەتمەدار ئەبێ وەك ماكرۆن بێ نەك وەك ئەو تیرۆریست و ئیسلامیستانەی هیچ بەهایەك بۆ مرۆڤ و داهێنانەكانی ناهێڵنەوە و ئەبینی چۆن بە ڕستەیەكی بێ گرێ و گۆڵ ئەركی سەرشانی دەوڵەت دیاری ئەكات و ئەڵێ ( هەموو ئەو هەلانەی لەسەر شانی كۆمارن بۆ هەموو گەنجانی دەڕەخسێنین بەبێ جیاكاری) .
بێزەحەمت بیخوێننەوە بزان ماكرۆن چی ئەڵێ (مامۆستا ئێمە بەردەوام دەبین لەگەڵ هەموو مامۆستا و وانەبێژان لە فەرەنسا ، بەردەوام دەبین لەسەر گوتنەوەی وانەی مێژوو بە هەموو شانازییەكانییەوە و بەهەمانشێوە بەگشت گۆڕانەكانیشیەوە. وانەكانی ئەدەبیات ، میوزیك و هەموو كارەكانی ڕووح و عەقڵ دەڵێینەوە . بەهەموو هێزمان حەز لە گفتوگۆ و گەنگەشە و بەڵگەی باوەڕپێكەر و باوەڕهێنان بە ڕێگەی ژیرانە دەكەین . حەز لە زانست و بابەتە مشتومڕ هەڵگرەكانی دەكەین . هەروەك تۆ ، كولتووری لێبووردەیی دەچێنین . هەروەك تۆ بەبێ سنوور هەوڵی تێگەیشتن دەدەین ، تاوەكو زیاتر تێدەگەین . هەر ئەوەشبوو كە دەیانویست ئێمەی لێ دووربخەنەوە).
جگە لە تیرۆریست و ئیسلامیەكان لە ئەردۆگانەوە تا ئەوەیان كە دڵی بە تیرۆرو ڕەشەكوژی تەسكینی تێ، ئەوانەی وا خۆیان بە خوێندەوارو ڕووناكبیرو سیاسی و شاعیرو نووسەرو هونەرمەندو ئەوانەیشی وا لە پێگەی حكومڕانی ئیداری و سیاسیی باڵادان لە باشووری كوردستان، یەك تۆزقاڵ هۆشیان هەبێ یان هۆشیان بێتەوە بەر ، سەرنجێكی ئەم بەشەی پەیامەكەی مارۆن ئەدەن و هیچی تر، ئەڵێ ( خۆمان فێری كۆمیدیا دەكەین، خۆمان فێری جیاوازی دەكەین. هەمیشە بەبیر خۆمانی دەهێنینەوە كە ئازادییەكانی ئێمە پارێزراو نابن تەنیا لە رێگەی كۆتاییهێنان بە رق و تووندوتیژی نەبێت، تەنیا لە رێگەی رێزگرتنی ئەویدیكە نەبێت)، بە ویژادانی مرۆڤ و مرۆڤایەتی، ئەمە لەكوێدا دژایەتی ئاینی ئیسلام یان هەر ئاین و ئاینزایەكی ترە؟!
بەڵێ كۆمەڵگای بێ كۆمیدیا، كۆمەڵگای بێ جیاوازی، ئازادی تێدا پارێزراو نابێ و تەنها بە كۆتایهاتنی ڕق و تووندو تیژی نەبێ، تەنیا لە رێگەی ڕیگرتنی ئەوی ترو بەرامبەرەوە نەبێ. ئەی بێزەحمەت لەكام سیستەمی حكومڕانی ئیسلامیستەكانا كۆمیدیا ئازادە؟ جیاوازی بیروڕا ئازادە؟ ڕق و تووندو تیژی باڵادەست نیە؟ لەكام كۆمەڵگای ئیسلامیستەكان فەلسەفەو فیكر ئازادە؟ گۆرانی و هونەر بەمانا ڕاستەقینەكەی ئازادە؟ گفتوگۆ بەمانا تەندرووستەكەی ئازادە؟
تێبینی: بۆ پەیامەکەی ماکرۆن پشت بەوەرگێڕانی ڕووداو بەستراوەو لەوێوە وەرگیراون