بڕیاری نوێی خۆپارێزی له‌ ڤایرۆسی كۆرۆنا ده‌رچوون

ژوری ئۆپه‌راسیۆنی ئیداره‌ی گه‌رمیان بۆ روبه‌ڕوبونه‌وه‌ی كۆرۆنا ژماره‌یه‌ك بڕیاری نوێی خۆپارێزی ده‌ركرد و رایگه‌یاند، هاتوچۆ له‌نێوان ئیداره‌ی گه‌رمیان و ناوچه‌كانی ده‌ره‌وه‌ی ئیداره‌ی هه‌رێم بۆ ماوه‌ی یه‌ك هه‌فته‌، پێویسته‌ كارمه‌ندان و كرێكاره‌كانی كه‌رتی تایبه‌ت پابه‌ندبكرێت به‌ به‌ستنی ده‌مامك ئه‌گه‌رنا به‌ 150 هه‌زار دینار غه‌رامه‌ ده‌كرێن.

به‌گوێره‌ی راگه‌یه‌ندراوێكی ژوری ئۆپراسیۆنی ئیداره‌ی گه‌رمیان،  ئه‌مڕۆ سێشەممە‌ ژوری ئۆپه‌راسیۆنی ئیداره‌ی گه‌رمیان بۆ روبه‌ڕوبونه‌وه‌ی ڤایرۆسی كۆرۆنا به‌ سه‌رپه‌رشتی سه‌رپه‌رشتیاری ئیداره‌ی گه‌رمیان و به‌ ئاماده‌بونی ئه‌ندامانی ژوری ئۆپه‌راسیۆن  كۆبوه‌وه‌، سه‌باره‌ت به‌ گرتنه‌به‌ری هه‌نگاوی پێویست بۆ روبه‌روبونه‌وه‌ی ڤایرۆسی كۆرۆنا، له‌ژێر ڕۆشنایی بڕیاره‌كانی  لیژنه‌ی باڵای به‌ره‌نگاربونه‌وه‌ی ڤایرۆسی كۆرۆنا و رێنماییه‌ ته‌ندروستیه‌كان، ئه‌م بڕیارانه‌ی لای خواره‌وه‌ په‌سه‌ندكران.

جه‌خت له‌سه‌ر پابه‌ندبون به‌به‌یاننامه‌ی وه‌زاره‌تی ناوخۆ كراوه‌ته‌وه‌

هه‌ر به‌گوێره‌ی راگه‌یه‌ندراوه‌كه‌، جه‌خت له‌سه‌ر پابه‌ندبون به‌به‌یاننامه‌ی وه‌زاره‌تی ناوخۆ كراوه‌ته‌وه‌، به‌جۆرێك میكانیزمی گونجاو پێویست و له‌به‌رچاوگرتنی بارودۆخی ته‌ندروستی گه‌رمیان ده‌گیرێته‌به‌ر

باس له‌وه‌شكراوه‌، ژوری ئۆپه‌راسیۆنی ئیداره‌ی گه‌رمیان هه‌ڵسه‌نگاندنی بۆدۆخی ته‌ندروستی گه‌رمیان له‌ژێر ڕۆشنایی یاداشت و ڕاسپارده‌ی به‌ڕێوه‌به‌رایه‌تی گشتی ته‌ندروستی گه‌رمیاندا كردوه‌ و ژماره‌یه‌ك بڕیاری ده‌ركردوه‌.

بڕیاره‌كان به‌مشێوه‌یه‌یه‌:

یه‌كه‌م: پێویسته‌ سه‌رجه‌م (ماركێت و ڕیستۆرانت و شوێنه‌ بازرگانییه‌كان و سه‌نته‌رو نۆرینگه‌پزیشكییه‌كان وپزیشكی ددان و كارمه‌ندانی ته‌ندروستی و تاقیگه‌یی و شوێنه‌گه‌شتیارییه‌كان و پاركه‌كان و كافتریاو چاخانه‌كان و هۆڵه‌كانی وه‌رزش و له‌شجوانی و مه‌له‌وانگه‌كان) به‌گرتنه‌به‌ری ڕێوشوێنه‌كانی خۆپارێزی و جێبه‌جێكردنی ڕێنماییه‌ ته‌ندروستییه‌كان كاره‌كانیان ئه‌نجام بده‌ن, به‌پێچه‌وانه‌وه‌ بۆهه‌ریه‌كێك له‌وكارو پیشه‌ جیاوازانه‌ سزای دیاریكراو له‌به‌یانی ژماره‌46ی وه‌زاره‌تی ناوخۆیان به‌سه‌ردا جێبه‌جێده‌كرێت.

دووه‌م: به‌رده‌وامیدان به‌قه‌ده‌غه‌كردنی گشت بۆنه‌كان(پرسه‌ی ماته‌مینی,ئاهه‌نگ و بۆنه‌ كۆمه‌ڵایه‌تییه‌كان)

سێیه‌م: ڕاگرتنی هاتوچۆ له‌نێوان ئیداره‌ی گه‌رمیان و ناوچه‌كانی ده‌ره‌وه‌ی ئیداره‌ی هه‌رێم بۆماوه‌ی یه‌ك هه‌فته‌.

چواره‌م: ژوری ئۆپه‌راسیۆنی ئیداره‌ی گه‌رمیان قائیمقامیه‌ته‌كانی سنوره‌كه‌ی ڕاده‌سپێرێت به‌هه‌ماهه‌نگی له‌گه‌ڵ به‌ڕێوه‌به‌رایه‌تی هاتوچۆی ئیداره‌ی گه‌رمیان و به‌ڕێوه‌به‌رایه‌تی ئاسایشی گه‌رمیان و پۆلیسی گه‌رمیان له‌گرتنه‌به‌ری ڕێوشوێنی پێویست , به‌رامبه‌ر ئه‌و شوفیرانه‌ی ئۆتۆمبیلی(تایبه‌ت, كرێ, بارهه‌ڵگر و ئۆتۆمبێلی هێڵه‌كانی گواستنه‌وه‌ی نێوشار) كارده‌كه‌ن و خۆیان و سه‌رنشینه‌كانیشیان پابه‌ندنه‌بون به‌ جێبه‌جێكردنی ڕێنماییه‌كان, بڕگه‌ی یازده‌یه‌م له‌به‌یانی ژماره‌46ی وه‌زاره‌تی ناوخۆیان به‌سه‌ردا جێبه‌جێبكرێت.

پێنجه‌م: دامه‌زراوه‌كانی كه‌رتی تایبه‌ت ده‌بێت كارمه‌ندان و كرێكاره‌كانیان پابه‌ندبكه‌ن به‌به‌ستنی ده‌مامك و ڕێنماییه‌ خۆپارێزییه‌كان جێبه‌جێبكه‌ن,به‌پێچه‌وانه‌وه‌بڕی(150.000)سه‌دوپه‌نجا هه‌زاردینارخاوه‌نی دامه‌زراوه‌كه‌ سزاده‌درێت.

شه‌شه‌م: ژوری ئۆپه‌راسیۆنی ئیداره‌ی گه‌رمیان له‌نزیكه‌وه‌چاودێری جێبه‌جێكردنی ئه‌م بڕیارو ڕاسپاردانه‌ ده‌كات,ئه‌ولیژنانانه‌ی كه‌له‌پێشوترداپیكهێنراون بۆبه‌دواداچون وپشكین ئاكتیڤده‌كرێنه‌وه‌ و سه‌ردانی مه‌یدانییان ده‌بێت و ئۆپه‌راسیۆنی ئیداره‌ی گه‌رمیانیش پشت به‌ڕاپۆرته‌كانیان ده‌به‌ستێت, به‌پێچه‌وانه‌شه‌وه‌ هه‌ر لیژنه‌یه‌ك كه‌مته‌رخه‌می له‌جێبه‌جێكردنی ئه‌ركه‌كانیاندا به‌دی بكرێت توشی لێپێچه‌نه‌وه‌ی یاسای ده‌بن.

حه‌وته‌م: پێكهێنانی لیژنه‌ی باڵای پشكینین و به‌دواداچون  له‌سه‌ر ئاستی ئیداره‌ی گه‌رمیان(به‌سه‌رۆكایه‌تی ئیداره‌ی گه‌رمیان و ئه‌ندامێتی به‌ڕێوه‌به‌رایه‌تییه‌ په‌یوه‌ندیداره‌كانی سنوره‌كه‌) تایبه‌ت به‌ پرسی ڕوبه‌ڕوبونه‌وه‌ی ڤایرۆسی كۆرۆنا.

هه‌شته‌م: ده‌سه‌ڵات ده‌درێت به‌قائیمقامیه‌ته‌كانی سنوری ئیداره‌ی گه‌رمیان بۆ گرتنه‌به‌ری هه‌ر ڕێوشوێنێكی دیكه‌ی پێویست بۆ خۆپارێزی له‌ ڤایرۆسی كۆرۆنا.

نۆیه‌م: ئه‌م بڕیارانه‌ له‌ كاتژمێر12:00ی شه‌وی 5ی ئابی 2020ه‌وه‌ جێبه‌جێده‌كرێن.